Xoghayaha Arrimaha Dibadda ee Mareykanka Marco Rubio ayaa sheegay in Iiraan aysan waligeed heli doonin hubka nukliyeerka ah, isagoo carrabka ku adkeeyay in Mareykanka uusan ogolaan doonin arrintaas.
Rubio oo ka hadlayay shir ay yeesheen wasiirrada arrimaha dibadda ee dalalka xubnaha ka ah NATO oo ka dhacay magaalada Brussels ee caasimada Belgium, ayaa sheegay in madaxweynaha Mareykanka Donald Trump uu sugayo tallaabada xigta ee la qaadi doono arrintan.
Wuxuu sheegay in uusan jirin waa sida hadalka uu u dhigaye waddan doonaya in Iiraan ay yeelato hub nukliyeer ah, isagoo xusay in Mareykanka uu sii wadi doono dadaallada lagu horjoogsanayo Tehran in ay horumariso hub noocaas ah.
Arrintan ayaa ku soo beegmeysa xilli Iiraan ay uga digtay wax tallaabo ciidan ah oo laga qaado kadib markii Trump uu ku hanjabay in uu duqeeyo, iyadoo sheegtay in ay si adag uga jawaabi doonto. Ciidanka Ilaalada Kacaanka Islaamiga ah ee Iiraan ee loo yaqaan IRGC ayaa isna digniin culus diray oo ay uga digeen cid kasta oo qalad ka gasha dalkaas, inay la kulmi doonto cawaaqib xumo adag.
Dhinaca kale, Israa’iil ayaa marar badan ku celcelisay in aysan ogolaan doonin in Iiraan ay hesho hub nukliyeer ah, iyadoo horey loo sheegay suuragalnimada weerar ay Israa’iil ku qaaddo xarumaha nukliyeerka ee Iiraan.
Iiraan ayaa cambaareysay hadallada madaxweynaha Mareykanka, iyadoo hoggaamiyaha sare ee Iiraan, Cali Khamayni uu ballanqaaday in si xoog leh looga jawaabi doono hanjabaadaha Mareykanka iyo Israa’iil.
Iiraan waxay sidoo kale warqad cabasho rasmi ah u dirtay dalka Switzerland oo matala danaha Mareykanka ee Tehran, waxayna sheegtay in haddii la weeraro ay si degdeg ah oo xoog leh uga jawaabi doonto.
Sarkaal Mareykan ah ayaa u sheegay warbaahinta in Mareykanka uu go’aansaday inuu xoojiyo ciidamada ka jooga Bariga Dhexe, kuwaas oo ka kooban diyaaradaha dagaalka ee F-15, F-16, F-35 iyo sidoo kale diyaaradaha Casriga ah ee B-2 oo la geeyay saldhigga Diego Garcia. Sidoo kale waxaa la xoojiyay difaacyada cirka, balse xiliga la geeyay lama shaacin.
12-kii Maarso, lataliyaha madaxweynaha Imaaraadka Anwar Gargash ayaa warqad uu ka siday Trump wuxuu u gudbiyay Iiraan, iyadoo oo Iiraan ay jawaabteeda u marisay dalka Cumaan.
Trump oo la hadlayay telefishinka Fox ee Mareykanka laga leeyahay ayaa sheegay in uu Khameyni u diray farriin uu ku yiri, “Waxaan rajeynayaa inaad wadaxaajood gasho sababtoo ah weerar ciidan oo aanu qaadno wuxuu noqon doonaa musiibo.”
HBN Online TV