Wasaaradda Kalluumaysiga iyo Khayraadka Badda ee Puntland ayaa shaaca ka qaaday in ay bilowday olole xooggan oo lagula dagaallamayo kalluumaysiga sharci-darrada ah ee ka dhaca biyaha Puntland. Wasaaraddu waxay sheegtay in tallaabadan ay muhiim u tahay ilaalinta khayraadka badda, kobcinta dhaqaalaha bulshooyinka xeebaha iyo sugnaanta cuntada.
War-saxaafadeedka ayaa lagu caddeeyay in cid kasta oo lagu helo inay jebisay sharciyada kalluumaysiga, shuruudaha rukhsadaha ama xeerarka kale ee khuseeya ay la kulmi doonto tallaabooyin adag oo sharci iyo maamul isugu jira, kuwaa oo ay ku jiraan qabashada doonyaha iyo maraakiibta, hakinta ama laalidda rukhsadaha, ganaaxyo lacageed iyo in lala wareego kalluunka ama qalabka sharci-darrada ah sida hadalka loo dhigay.
Sidoo kale, wasaaraddu waxay hoosta ka xarriiqday in aan loo dulqaadan doonin fal kasta oo wax u dhimaya sida ay ku dooday deegaanka badda ama xuquuqda kalluumaysatada maxalliga ah. Waxay xustay inay si dhow ula shaqaynayso hay’adaha fulinta sharciga si loo xoojiyo kormeerka badda—loona hubiyo in cadaaladda la horkeeno cid kasta oo ku kacda kalluumaysi sharci-darro ah.
Dhanka kale, Puntland waxay sheegtay inay soo dhoweynayso maalgashiga sharciyeysan ee ku aaddan kalluumaysiga, gaar ahaan kuwa la xiriira kalluumaysiga waara, kalluun-beerista, iyo horumarinta silsiladda qaboojinta, iyada oo Wasaaraddu ay tilmaantay in maalgashiyada noocan ah ay gacan ka geysan karaan shaqo-abuurka iyo kor u qaadidda wax-soo-saarka gudaha.
Ugu dambeyn, Puntland ayaa adkaysay go’aankeeda ku aaddan maamul-wanaagga iyo ilaalinta khayraadka dabiiciga ah, iyadoo ugu baaqday dhammaan daneeyayaasha gudaha iyo caalamiga ah inay taageeraan horumarinta kalluumaysiga. Wasaaraddu waxay xustay in dadaalladan ay muhiim u yihiin mustaqbalka jiilalka hadda iyo kuwa soo socda.
HBN ONLINE TV