Maamulka Puntland oo ka hadlay “Gogosha wadahadal” ee madaxweynaha Dowladda Federaalka Soomaaliya uu u fidyey dhinacyada Siyaasaadda ayaa ganafka ku dhufatay in ay wax wada xaajood ah aanay diyaar u aheyn, aysane hadda waqtine u heynin, maadama ay dagaal adag ku jirto.
Wasiirka warfaafinta Puntland Maxamuud Caydiid Dirir oo la hadlay warbaahinta ayaa sheegay in inta dagaalka ay ku jiraan, muddo-xileedkiisune uu soo dhamaanayo inta u hartay Madadxweyne Xasan Shekh in aanay waxba ku darsan doonin.
Madaxweyne Deni oo uu ku tilmaamay hoggaamiye dagaal ayuu sheegay in hadda wax wadahadal ah uusan u soo jeedin, maadama uu yahay sida uu hadalka u dhigay abaanduulaha dagaalka Puntland ay ku jirto.
“Deni waqti ma hayo, rasaas iyo tuute ayuu qaybinayaa, dagaal waa abaanduule hoggaaminaya.” ayuu yiri Wasiir Dirir.
Sidoo kale wasiirku wuxuu sheegay waa sida hadalka uu u dhigay in ninkaasi oo uu ula jeedo Madaxweyne Xasan Sheekh “waa baaga muundo, Isagaa madaxweyne, Ra’isal Wasaare iyo wax walba isu ah”. ayuu yiri.
Marka laga soo tago Puntland oo gaashaanka u duruurtay gogosha loo fidiyey saamileyda siyaasadda, hadane maamulka ay isku mowqifka yihiin ee Jubbaland, hoggaamiyaheeda iyo siyaasiyiinta kale ee mucaaradka ayaa si isku mid ah u soo dhaweeyey wadahadalkan uu iclaamiyey madaxweynaha, sidoo kalane diyaar u yihiin arimaha dagaalka ay ku taageeraan.
HBN ONLINE TV