Guddoomiyaha Urur-siyaasadeedka Hilaac Prof. Axmed Ismaaciil Samatar ayaa shaaca ka qaaday inay ka tanaasulay doorashada ururrada Somaliland ee soo socota, isaga oo sababta koowaad ku sheegay in ururada cusub laga reebay tartanka doorashada oo dhawaan la filayo in ay qabsoonto.
Samatar oo warbaahinta la hadlay ayaa sheegay in tallaabadaasi tahay mid sharci darro ah, isla markaana dhaawacaysa midnimada Somaliland, isaga oo ka joojinta ururada cusub ee doorashada madaxtooyada ku sheegay in ay wiiqayso mabaadi’da dimuqraadiga ah.
“Aniga oo Axmed ah, waxaan go’aansaday in aanan doorashada ka qaybgelin sida ay u qaabaysan yihiin, Hilaac ahaanna wax amar ah ma soo saarno, laakiin waxaan soo jeediyay inaan laga qaybgelin doorashada oo aynaan xalaalayn waxa jira sharci-darro ah,” ayuu yiri Samatar.
Isaga oo hadalkiisa sii wata waxa uu ku dooday in nidaamka doorashada Somaliland uu yahay mid ay beeluhu ka taliyaan, isla markaana ay maamulaan saddexda xisbi ee la aasaasay, kuwaas oo uu ku andacoonayo in ay hor istaageen in si xalaal ah loo qabto doorashada madaxtooyada.Tani, ayuu rumaysan yahay, inay tahay caddaalad darro iyo mid aan la aqbali karin labadaba.
Samatar ayaa daboolka ka qaaday in uu ka codsaday in tixgalin gaar ah laga siiyo ururka Hilaac in lagu daro xisbiyada ka qeyb galaya doorashada madaxweynaha. hase yeeshee, codsigaas waa la diiday, taasoo keentay in uu go’aansado inuu ka tanaasulo tartanka.
Dhinaca kale, hoggaanka sare ee ururka Hilaac ayaa ku dhawaaqay in Samatar laga qaaday xilkii guddoomiyenimo. Waxayna cadeeyeen in ay doonayaan inay ka qaybgalaan doorashada soo socota, waxayna ku eedeeyeen Samatar in uu qaatay go’aano hal dhinac ah oo aan la isku raacsanayn.
HBN ONLINE TV