Maxkamadda Racfaanka Gobolka Galgaduud ayaa maanta xukun dil ah ku riday labo ka mid ah rag laga shakisanaa inay ka dambeeyeen dilkii Hooyo Sahro Cartan Xirsi iyo saddexdeeda gabdhood, kuwaas oo lagu dilay deegaanka Qayib. Kiiskan ayaa ahaa mid dhowr jeer loo dhageystay heerar kala duwan oo garmaqal ah.
Maxkamaddu waxay sheegtay inay jebisay xukunkii hore ee Maxkamadda Gobolka Galgaduud, iyadoo ku dhawaaqday in eedeysanayaasha kala ah Cabdi Cusmaan Cabdullaahi iyo Galad Axmed Xuseen lagu helay dambiga dilka ah, laguna xukumay dil toogasho oo ah qisaasta afarta marxuum. Ayuub Maxamed Cabdi ayaa lagu waayay eedda dil kas ah, balse waxaa lagu xukumay shan sano oo xarig ah.
Sidoo kale, Maxkamaddu waxay maamulka Galmudug u xukuntay labo qori oo AK47 ah oo ay sheegtay in fal-dambiyeedka ay ku geysteen Cabdi Cusmaan iyo Galad Axmed . Waxay intaas ku dartay in xukunkaasi ka furan yahay cabasho loo gudbin karo Maxkamadda Sare ee Galmudug.
Dilka Hooyo Sahro iyo gabdhaheeda oo lagu tilmaamay mid salka ku haya aano qabiil ayaa bulshada ka dhex abuuray murugo iyo caro weyn, maadaama si arxan darro ah loo fuliyay dilkooda xilli saqdhexe ah, kaasi oo dhacya horaantii bishii Octobar ee sanadkan.
Dhanka kale, waxaa jira kiis ka dambeeyey oo dhacdaadan lala xariiray, kana dhacay gobolka Galgaduud, kaasi oo lagu dilay hooyo,laguna dhaawacay caruur yar oo ay dhashay deegaanka Guudoole ee gobolka Galgaduud.
Hbn Online Tv