Golaha Wasiirrada Xukuumadda Soomaaliya oo maanta yeeshay kulankoodii todobaadlaha ahaa ayaa looga hadlay dagaalka ka dhanka ah kooxda Alshabaab ee ka socda qeybo ka mid ah gobollada dalka, iyadoo la soo bandhigay samhinta shidaalka Soomaaliya iyo xiliga qodistiisa la guda galayo.
Kulanka oo lagu faah-faahiyey warbixinada ku aaddan dagaallada socda ee lagu ciribtirayo sida hadalka loo dhigay argagixisada ayaa lagu bogaadiyey ciidanka dowaladda iyo kuwa deegaannada ee dagaalka kula jira Alshaab.
Sidoo kale, Ra’iisul Wasaaraha Soomaaliya Xamsa Cabdi Barre oo golaha warbixin ka siiyey booqashadii uu ku tagey furimaha dagaalka ee gobolka Shabeellaha Hoose ayaa golaha faray in la joogteeyo sida lagu carrrabaabay warbixinta xafiiskiisa taakuleynta iyo garab-istaagga ciidanka Qaranka.
Dhanka kale, Wasaaradda Batroolka oo golaha la wadaagtay halka ay marayaan howlaha shidaal baarista ayaa caddeysay in ka hor dhammaadka sanadkan la soo gabagabeyn doono shaqada baarista ee loo yaqaan (3D Seismic Survey), si loo cayimo goobaha shidaalku ceegaago, looguna gudbo heerka xiga ee qodaalka ceelasha shidaalka.
Shirka Golaha ayaa lagu ansixiyey soo jeedinta Wasaaradda Qorshaynta ee ku aaddan Agaasime ku-xigeenka Hey’adda Istaatistikada Qaranka Cabdiraxmaan Cumar Daahir oo loo cusbooneysiiyay muddo xilleedka.
HBN ONLINE TV