Wasaaradda Arrimaha Dibadda Soomaaliya ayaa u yeertay Safiirka Dowladda Itoobiya ee Soomaaliya, Suleymaan Dedefo Woshe, si ay ugu weydiiso sababta uu ugu hadlay arrimaha gudaha dalka, kadib wareysi uu dhowaan bixiyay oo uu ku dhaliilay ciidamada Masar ee lagu wado inay ku biiraan howlgalka Midowga Afrika ee AUSSOM.
Ilo diblomaasiyadeed ayaa sheegay in Dowladda Federaalka Soomaaliya DFS ay safiirka ku wargelisay in hadalladiisu ahaayeen faragelin qaawan oo aan loo dulqaadan karin, isla markaana ka hor imaanaya dhaqanka iyo qawaaniinta caalamiga ah ee diblomaasiyadda.
DFS ayaa ku adkaysatay in Itoobiya looga baahan yahay inay faraha kala baxdo arrimaha gudaha ee Soomaaliya, ayna ixtiraamto madax-bannaanida iyo go’aannada siyaasadeed ee dalka.
Safiir Dedefo ayaa hadalkiisa ku muujiyay shaki ku saabsan waxqabadka ciidamada Masar ee Soomaaliya imanaya, isaga oo si cad u dhaleeceeyay doorka Masar, halka uu dhinaca kale ku bogaadiyay tallaabooyinka dowladda Itoobiya ee la xiriira biyaxireenka Webiga Nile — arrin si weyn uga dhex aloosay xiisad siyaasadeed iyo amni Itoobiya iyo Masar.
Diblomaasiyiinta falanqeeya arrimaha gobolka ayaa sheegaya in hadallada safiirka ay sii kordhin karaan xiisadda siyaasadeed ee u dhexeysa Soomaaliya iyo Itoobiya, xilli ciidankii ugu horreeyay ee Masaarida ee qayb ka noqonaya howlgalka AUSSOM ay dhowaan soo dhammeeyeen tababarkii loogu diyaarinayay hawsha nabad ilaalinta.
Waxaa la sugayaa natiijada rasmiga ah ee kasoo baxda kulanka Wasaaradda Arrimaha Dibadda iyo Safiirka Itoobiya, iyo jawaabta ay labada dal si rasmi ah uga qaadan doonaan khilaafkan diblomaasiyadeed oo kusoo beegmaya xilli xaalad cakiran ay ka taagan tahay gobolka Geeska Afrika.
HBN ONLINE TV