Kulan gaar ah ayaa maanta ka dhacay Muqdisho, kaas oo dhexmaray saraakiisha difaaca ee Soomaaliya iyo Masar, iyadoo diiradda lagu saaray xoojinta iskaashiga dhinacyada difaaca.
Wasiiru Dowlaha Gaashaandhigga Soomaaliya, Cumar Cali Cabdi, oo uu wehliyo Taliyaha Ciidanka Dhulka XDS, Sarreeye Guuto Sahal Cabdullaahi Cumar, ayaa xarunta Wasaaradda ku qaabilay Col. Axmed Fatxi Cabdelsatar Al-Xusayni, u qeybsanaha Arrimaha Difaaca ee Safaaradda Masar.
Wadahadalka ayaa lagu faaqiday amniga iyo diyaar-garowga howlgalka Midowga Afrika ee Taageerada iyo Xasilinta Soomaaliya (AUSSOM).
Intii kulanka lagu guda jiray, labada dhinac ayaa sidoo kale isku soo hadal qaaday tababarrada ciidamada iyo dardargelinta diyaar-garowga ciidamada Masar ee ku soo biiraya AUSSOM, iyaga oo ku heshiiyay in iskaashigan uu kaalin muhiim ah ka qaato amniga Soomaaliya iyo xasilloonida gobolka.
HBN ONLINE TV