Dawlada Mareykanka ayaa mar kale si cad uga hadashay mowqifkeeda ku aaddan Somaliland, iyadoo gudaha dalkaasi ay ka soo yeerayaan baaqyo ku aadan aqoonsi caalami ah oo la siiyo Somaliland.
Afhayeen u hadlay Waaxda Arrimaha Dibadda ee Mareykanka ayaa u sheegay telefishinka Fox News in Mareykanku uu weli aqoonsan yahay midnimada dhuleed iyo madax-bannaanida Jamhuuriyadda Federaalka Soomaaliya, taas oo ay ku jirto Somaliland. Wuxuu caddeeyay inaysan jirin wadaxaajoodyo rasmi ah oo socda oo u dhexeeya Washington iyo masuuliyiin Somaliland ah oo ku saabsan aqoonsi dawladnimo.
Hadalkan ayaa yimid maalmo kadib markii Senatar-ka Maraykanka Ted Cruz oo ah Guddoomiyaha guddi hoosaadka Arrimaha Afrika u qabilsan Guddida Arrimaha Dibadda ee Senate-ka Mareykanka uu ku booriyay Madaxweyne Donald Trump in uu si rasmi ah u aqoonsado Somaliland, isagoo ku tilmaamay tallaabo istiraatiiji ah oo ka caawin karta Mareykanka inuu ka hortago saameynta sii kordhaysa ee Shiinaha, Ruushka iyo wax uu ugu yeeray kooxaha xagjirka ah ee gobolka Geeska Afrika.
Dhanka kale, Madaxweynaha Somaliland, Cabdiraxmaan Maxamed Cabdullahi Ciro, ayaa wareysi uu siiyay warbaahinta caalamiga ah ku sheegay in waa sida hadalka uu u yiriye aqoonsigu “ku dhow yahay,” isagoo tilmaamay in Somaliland ay wadahadallo kula jirto saraakiil Mareykan ah oo dhanka difaaca iyo diblomaasiyiinta Washington.
Si kastaba, Mareykanka weli kama uusan bixin wax isbeddel rasmi ah oo siyaasadeed, wuxuuna ku adkaysanayaa siyaasaddii hore ee ahayd in Somaliland ay weli ka tirsan tahay Soomaaliya.
HBN ONLINE TV