Abdulqadir Axmed Aw Cali (Firdhiye) ayaa si rasmi ah loo doortay Madaxweynaha Dawlad Goboleedka Waqooyi Bari Soomaaliya ee shanta sano ee soo socota, kadib markii uu helay codad sare oo ka tarjumaya taageero ballaaran.
Wareegii koowaad ee doorashada, Firdhiye ayaa hore uga soo gudbay codad sare, ugu dambeyntiina wuxuu kaga guuleystay musharaxii kale Cabdirisaaq Khalif Axmed si aqlabiyad leh, isagoo helay seddex laab codad ka badan codadka uu Cabdirisaaq Khalif helay.
Sida ay ku dhawaaqeen Guddiga Doorashooyinka, Firdhiye ayaa helay 62 cod, halka Cabdirisaaq Khalif uu helay 18 cod.
Sidoo kale, doorashada madaxweyne ku-xigeenka oo ka fududayd tan madaxweynaha ayaa cod afti dastuur ah waxaa ku guuleystay Cabdirashiid Yuusuf Jibriil, isagoo helay 65 cod sida ay guddiga doorashooyinka sheegeen.
Dhanka kale, labada Madaxweyne ayaa lagu dhaariyey isla goobta doorashada lagu soo gabagabeeyey.
Ololaha doorashada musharraxiinta madaxweyne iyo ku-xigeen ee maamulka Waqooyi Bari Soomaaliya ayaa si weyn diiradda loogu saaray magaalada Ceerigaabo, oo noqotay xuddunta doodaha siyaasadeed, iyadoo musharraxiintu ku adkeysteen in gobolka si buuxda loogu soo celin doono gacanta maamulka cusub.
Madaxweyne Firdhiye ayaa khudbaddiisa ku adkeystay waxqabadkiisa siyaasadeed iyo ka gudbidda caqabadaha amni ee jira, gaar ahaan sidii shacabka Ceerigaabo loogu celin lahaa sida uu hadlaka u dhigay guryahoodii.
Doorashada maanta oo si weyn isha loogu hayay ayaa qaadatay saacado badan, waxaa loolanku ahaa mid soo jiitamayey bilihii iyo todobaadyadii la soo dhaafay. Madaxda dowladda dhexe iyo kuwa maamullada qaar ayaa hambalyo u diray hoggaanka cusub ee lagu doortay magaalada Laascaanood.
Maamulka Waqooyi Bari Soomaaliya ayaa hadda noqday mid dhameystiran, isagoo ka kooban, Madaxweyne, Madaxweyne ku-xigeen, Guddoomiye iyo laba ku-xigeen iyo Baarlamaan ka kooban 83 xildhibaan.
HBN ONLINE TV