Madaxwaynaha Kenya William Ruto ayaa sheegay in dalkiisu uu soo magacaabi doono Soomaaliya qof ka socda Bulshada soo saarta Qaadka Miirowga, kaasi oo noqon doona safiir dalkiisa u fadhi doono dadka baareyda qaadka ah, xili dalkaasi uu wajahayo culeysyo dhaqaale xumo oo adag.
Ruto oo ka qeyb galay isu soo bax safarkiisa looga soo dhaweeyey gobolka qaadka beera ee Kenya ayaa cod-dheer ku sheegay in wada hadallo uu kala yeeshay Dowladda Soomaaliya iyo maamulada, sidii loo sixi lahaa qiimaha qaadka Miirowga, isaga oo dad badan kula hadlayey gaarisiisa oo uu dhex taagnaa.
“Waxaan la hadlay Madaxweyneyaasha Soomaaliya, Jubaland iyo Somaliland, waxaana kala hadlay qiimaha cusub ee jaadka iyo sidii suuq ballaaran loogu heli lahaa jaadka aad u iib-geysaan Soomaaliya, haddaa kadibna qiimahaas ayaa lagu jaan-goyn doonaa qaadka” ayuu yiri William Ruto.
Sidoo kale, Ruto waxaa uu shacabka Meru u ballan qaaday in uu mid ka mid ah iyaga ka dhigi doono safiirkooda jooga Soomaaliya, isga oo leh “qiimaha qaadka aan Soomaaliya ugu iibgeyno ma ahan mid sax ah, waxaan ku dadaaleynaa in qiimo macquul ah aan ku iibino qaadka”.
Tillaabadan ayuu Madaxweynaha Kenya uga danleeyahay si ganacsatada Qaadka Miirowga ay qeyb uga noqdaan wada hadallada iyo gorgortanka la gula jira Soomaaliya ee la xiriira qiimaha qaadka, iyada oo dalkiisu wajahayo xaalada dhaqaale xumo iyo sicir-barar saameyn ku yeeshay waxyaabaha aas aasiga ah.
Dhowr jeer oo hore Ganacstada iibiya qaarka Miirowga ayaa joojiyay qaadka ay keeni jireen Soomaaliya, sababo la xiriira isbadalka qiimaha qaadka.
Si la mid ah dadka qaadka sii iibiya Soomaaliya ee ka ganacsada ayaa cabashooyin ka soo gudbiyey, ka dib markii ay sheegeen in qiimaha qaadka uu aad u qaaliyoobay si laban laab ah.
HBN ONLINE TV