Dowladda Itoobiya ayaa beenisay warar dhawaan lagu faafiyay baraha bulshada ee sheegayay Adis Ababa ay go’aansatay in ay ka laabato heshiiskii Badda ee ay la gashay maamulka Somaliland horaantii sanadkan, kaasoo dhaliyay khilaaf diblomaasiyeed oo u dhaxeeya Soomaaliya iyo dalka Itoobiya.
Qoraal ka soo baxay Xafiiska Ra’iisul Wasaaraha Itoobiya ayaa lagu daabacay bogga X ee horay oo oran jiray Twiter, in wararka lagu faafiyay baraha Internet-ka ee ku saabsan heshiiska Is-afgaradka (MOU) ee Somaliland in ay yihiin kuwo been abuur ah.
Warqad qoraal ah oo ay ku xardhan tahay astaanta Ra’iisal wasaaraha Itoobiya lagu faafiyey baraha bulshada, ayaa lagu sheegay in dawladda Itoobiya go’aansatay inay baabi’iso heshiiskii ay la gashay Somaliland, ka dib markii ay la tashatay dalal badan oo Ingiriisku ka mid yahay iyo dhammaan xubnaha ka socday dawladdaha G7.
Xiisada u dhaxeysa Addis Ababa iyo Muqdisho ayaa sare u kaceysa kadib markii bishii Janaayo heshiiskan ay kala saxiixdeen Abiy Axmed iyo Muuse Biix . Itoobiya waxay ogolaatay inay si rasmi ah u aqoonsato Somaliland, iyada oo heleysa 20 kiiloomitir oo marinka Badda Cas ah ee gobolka Awdal oo ay ka dhisaneyso dekad ganacsi mid ciidan muddo 50 sano ah.
Hishiiskaas waxaa ka carootay dowladda Soomaaliya isla markaana waxa ay wacad ku martay in aysan ogolaan doonin in taako kamid ah dhulkeeda in la qaato, kuna tilmaamtay xad-gudub ka dhan ah dhulkeeda.
HBN NEWS DESK