Dowladda Itoobiya iyo maalqabeenka caanka ah ee u dhashay Nigeria Aliko Dangote ayaa kala saxiixday heshiis lagu dhisayo wershad bacrimin ah oo ku kacaysa $2.5 bilyan, taas oo laga hirgelin doono magaalada Goday ee deegaanka Soomaalida.
Wershaddan, oo qorshuhu yahay inay sannad kasta soo saarto 3 milyan oo tan oo bacrimiye ah, waxay ka mid noqon doontaa kuwa ugu weyn Afrika, isla markaana waa tii ugu ballaarneyd ee abid laga dhiso Itoobiya. Sida ku cad heshiiska, Itoobiya waxay yeelan doontaa 40% saamiga mashruuca, halka Dangote Group ay haysan doonto 60%.
Ra’iisul Wasaaraha Itoobiya Abiy Axmed ayaa mashruucan ku tilmaamay “tallaabo go’aan leh oo ku wajahan xornimada cunnada,” isagoo carrabka ku adkeeyay in uu abuuri doono shaqooyin badan, sahay bacrimin oo joogto ahna siin doono beeraleyda muddo dheer wajahayay caqabado.
Mashruucani waxa uu yarayn doonaa ku tiirsanaanta bacriminta dibadda laga keeno, wuxuuna hoos u dhigi doonaa qiimaha gudaha qaaradda, iyadoo deegaanka Soomaalida uu ka heli doono fursado shaqo, horumar dhaqaale, iyo koboca kaabayaasha.
Hadda, beeraleyda Itoobiya ayaa wajahaya yaraanta bacriminta kiimikaad oo qiimaheedu labanlaabmay sanadkii hore, taas oo khatar ku ah wax-soo-saarka dalagyada iyo nolosha dadka.
Aliko Dangote, oo hore ugu caan baxay maalgashiyada dhanka saliidda, sibirka iyo cuntada, ayaa mashruucan cusub ku sii xoojinaya xiriirka dhaqaale ee u dhexeeya Itoobiya iyo Nigeria.
HBN ONLINE TV