Israa’iil waxay sii wadaa weerarada iyo duqeymaha dhimashada badan dhaliyay ee ka dhanka ah Marinka Qaza maalintii 19-aad oo xiriir ah. Warbaahinta maxaliga ah ayaa sheegaysa in ciidanka Israa’iil ay xoojiyeen duqeymaha cirka, dhulka iyo badda ah ee ay ka wadaan gees kasta oo ka mid ah Marinka Gaza.
Ilo caafimaad ayaa u sheegay Al Jazeera in 10 Falastiiniyiin ah la dilay tan iyo waaberigii maanta, taasoo ka dhalatay duqeymaha joogtada ah ee Israa’iil ka waddo Marinka Gaza,iyadoo la xaqiijiyay in ciidamada Israa’iil ay qarxiyeen dhismayaal deegaan oo ku yaalla magaalada Rafax.
Isla wararkan, Milateriga Israa’iil ayaa shaaciyay bilaabidda hawlgal dhulka ah oo ka socda xaafadda Shujaaciyah ee waqooyiga Marinka Gaza, ujeeddaduna tahay ballaarinta aagga amniga iyo cadaadis militari oo lagu doonayo in lagu xoojiyo gacan-ku-haynta deegaanno cusub oo ku yaalla Marinka si loo soo furto maxaabiista.
Ciidanka Israa’iil ayaa sheegay in guutada 401-aad ay ballaarisay aagga ay ka hawlgalayaan ee waqooyiga Marinka Gaza isla markaana ay burburisay kaabayaal ay lahayd Xamaas. Amarada milateriga Israa’iil ee lagu dalbanayo in laga guuro qaybo badan oo Gaza ah ayaa sababay barakac qasab ah oo baaxad leh, iyadoo dadku ka cararayaan duqeymo oo raadinayaan meelo ammaan ah oo ku yaalla Marinka.
Dhinaca kale, Ururka Xamaas ayaa sheegay in kala bar maxaabiista Israa’iil ay ku sugan yihiin deegaannada Israa’iil ay dalbatay in laga guuro maalmahan la soo dhaafay. Xamaas waxay xaqiijisay inay go’aansatay inaysan ka bixin maxaabiistaas deegaannadaas, isla markaana ay ku hayaan ilaalin amni oo adag, hase yeeshee ay khatar weyn ay ku jirto noloshooda, iyadoo mas’uuliyadda badbaadintooda dusha ka saartay xukuumada Israa’iil.
Kumannaan Falastiiniyiin ah ayaa si qasab ah looga barakiciyay xaafadaha Shujaaciyah iyo Seytuun ee bariga magaalada Gaza, ka dib markii Israa’iil ay bixisay digniino degdeg ah oo ku saabsan in la banneeyo. Warbaahinta maxaliga ah ayaa sheegaysa in boqollaal qoys ay la baxsadeen wixii ay qaadi karaan, ayna u guureen dhinka bartamaha iyo galbeedka ee magaalada, iyagoo raadinaya hoy ammaan ah.
Arrintani waxay ku soo beegmaysaa iyadoo warbixin uu qoray wargeyska Wall Street Journal uu shaaciyay in Israa’iil ay hirgelinayso qorshe ay ku qabsanayso dhul-gal ballaaran oo Gaza ah, ujeeddadiisuna tahay haysasho muddo dheer ah iyo in gebi ahaanba la tirtiro saldhigyada Xamaas ee goobahaasi, inkastoo khubaradu sheegayso iska caabinta waxay sugayaan in ciidanka Israa’iil gudaha u soo wada galaan Gaza ka dibna ay kula dagaalamaan luuq luuqyada , wadooyinka & guryaha burbursan taasi oo ah midda ugu wayn ee cabsida ku haysa ciidnaka duulaanka ah.
HBN ONLINE TV