Ololaha doorashada Musharaxiinta madaxweyne iyo ku xigeen ee maamulka Waqooyi Bari Soomaaliya ayaa si weyn diiradda loogu saaray magaalada Ceerigaabo, taas oo noqotay xuddunta doodaha siyaasadeed. 10-ka musharrax ee u taagan xilalka madaxweyne iyo ku-xigeen ayaa si isku mid ah u ballanqaaday inay mudnaanta siiyaan arrimaha qadiyadda Ceerigaabo, iyagoo ku nuuxnuuxsaday in gobolka si buuxda loogu soo celin doono sida hadalka u dhigeen gacanta maamulka cusub.
Cabdulqaadir Axmed Aw Cali (Firdhiye), hoggaamiyihii hore ee SSC-Khaatumo oo markale u taagan xilka madaxweynenimo, ayaa khudbaddiisa ku adkeystay inuu leeyahay khibrad siyaasadeed iyo mid amni oo uu kaga gudbi karo caqabadaha jira, gaar ahaan sidii shacabka Ceerigaabo loogu celin lahaa guryahoodii. Hase yeeshee, Firdhiye ayaa wajahaya culeys siyaasadeed kadib markii hadalkiisa loo fasiray mid dhaleeceyn ku wajahan musharraxiin kale, isagoo si kulul ugu eedeeyay in ay ka soo horjeedeen hirgelinta dastuurka iyo inay doonayeen in maamulka lagu sii hayo ku-meelgaar.
Musharraxiinta kale, inkasta oo aanay si toos ah eedeymo isugu jeedin, haddana waxay soo bandhigeen ballanqaadyo siyaasadeed iyo qorshayaal dhisme adag oo lagu xoojinayo maamulka cusub oo Ceerigaabo iyo dhismaha hormarineed.
Guntanka arrinta ayaa ah in musharraxiintu si isku mid ah u muujiyeen doonista in maamulka Waqooyi Bari uu yeesho awood siyaasadeed oo xoojin karta tan federaalka, isla markaana si cad uga jawaabi karta arrimaha la xiriira Somaliland, gaar ahaan magaalada Ceerigaabo oo noqday tiirka ololaha iyo qadiyadda siyaasadeed ee ugu weyn.
Isha ku hay HBN ONLINE TV