Golaha Mustaqbalka Soomaaliya, oo ah isbahaysi mucaarad ah, ayaa sheegay in ay fashilmeen wadahadalladii siyaasadeed ee Muqdisho ay kula yeesheen Dowladda Federaalka Soomaaliya intii u dhaxeysay 13-ka ilaa 15-ka May, kadib markii labada dhinac ay ku guuldareysteen inay heshiis ka gaaraan hannaan siyaasadeed oo kala guur ah.
Bayaan uu Goluhu soo saaray 15-ka May ayuu ku sheegay in wada xaajoodyada, oo ay fududeynayeen xubno ka tirsan beesha caalamka, ay burbureen sababo la xiriira khilaafyo ku saabsan sharciyadda dastuuriga ah, awood qaybsiga, iyo maamulka marxaladda kala guurka siyaasadeed ee Soomaaliya.
Golaha Mustaqbalka ayaa ku eedeysay maamulka Madaxweyne Xasan Sheekh Maxamuud inuu diiday qorshe ay ku tilmaameen hannaan kala guur loo dhan yahay oo loogu talagalay in wax looga qabto waxa Goluhu ku sheegay firaaq dastuuriga ah ee ka dhashay dhammaadka muddo xileedka madaxweynaha 15-ka May 2026, sida ku cad qodobka 91-aad ee dastuurka ku meel gaarka ah ee Soomaaliya.
Goluhu wuxuu markale ku celiyay mowqifkiisa ah in Xasan Sheekh Maxamuud hadda loo aqoonsado madaxweyne hore, isagoo sheegay in dowladda federaalka ay tahay inay ku shaqeyso awood fulineed oo xaddidan inta lagu jiro muddada kala guurka, islamarkaana ay ku ekaato hawlaha maamulka caadiga ah kana fogaato go’aanno hal dhinac ah oo la xiriira arrimaha siyaasadda, dastuurka, doorashooyinka iyo amniga qaranka.
Golaha Mustaqbalka Soomaaliya ayaa sidoo kale ka digay in tallaabooyinka hal dhinaca ah ee madaxweynaha ay sii kordhin karaan xiisadaha siyaasadeed isla markaana ay wiiqi karaan sharciyadda dastuuriga ah iyo xasilloonida dalka, xilli Soomaaliya ay weli wajahayo khataro amni oo kaga imaanaya Al-Shabaab iyo dagaalyahanno xiriir la leh Daacish.
Goluhu wuxuu ugu baaqay ciidamada ammaanka inay gutaan waajibaadkooda dastuuriga ah, wuxuuna ku dhawaaqay qorshe siyaasadeed oo ballaaran oo lagu wajahayo marxaladda kala guurka ee dalka. Waxa uu sidoo kale u mahadceliyay saaxiibada caalamiga ah ee ku lug lahaa fududeynta wadahadallada, isagoo markale xaqiijiyay sida ay uga go’an tahay in xal siyaasadeed loo helo qalalaasaha jira.
HBN Online TV