Faahfaahino dheeraad ah ayaa ka soo baxaya dagaal kooban oo maanta ka dhacay degmada Marka ee gobolka Shabeellaha Hoose, kaas oo dhexmaray laba ciidan oo kala taabacsan guddoomiyaha degmada iyo guddoomiye ku xigeenka amniga.
Israsaaseynta oo ka dhacday gudaha xarunta maamulka ayaa sababtay dhaawaca hal askari, iyadoo wararka hordhaca ahi sheegayaan in shacabka qaarkood uu dagaalku saameeyay.
Guddoomiye ku xigeenkii hore ee degmada, Cabdikariim Dheere, ayaa sheegay in ciidamadii labada dhinac ay ku dagaalameen xarunta degmada, balse ay ku guuleysteen in ay dagaalka joojiyaan markii ay goobta gaareen. Wuxuu intaas ku daray in is-qabsigu ka dhashay arrimo la xiriira kaarka Aqoonsiga Qaranka oo dhawaan degmada la geeyay, inkasta oo aan weli jirin ilo madax-bannaan oo xaqiijiyay sababta rasmiga ah ee muranka.
Dhinaca kale, warbaahinta degmada Marka ayaa ku dhawaaqday inay joojisay shaqadii warbaahineed, kadib markii ay maamulka degmada ku eedeysay faragelin joogto ah, cadaadis shaqo, caqabado amni iyo handadaad ay dhowr jeer kala kulmeen waa sida ay hadalka u dhigeene guddoomiyaha degmada iyo saraakiisha amniga.
Marko ayaa marar badan horay uga dhacay isku dhacyo u dhexeeya ciidamada dowladda iyo weeraro gaadmo ah oo ay geystaan dagaalyahannada Alshabaab ka gaysteen.
Hbn Online Tv