Wafdi uu hoggaaminayo Wasiirka Gaashaandhigga Soomaaliya, Axmed Macallin Fiqi, oo ay wehliyaan Taliyaha Ciidanka Xoogga Dalka, Gen. Odowaa Yuusuf Raage, iyo saraakiil sare oo kale, ayaa maanta u safray dalka Masar. Ujeedada safarkooda ayaa ah xoojinta xiriirka istiraatiijiga ah ee labada dal, gaar ahaan wadatashiga ku saabsan dib-u-dhiska iyo tayeynta ciidamada qalabka sida ee Soomaaliya.
Masar ayaa la filayaa inay Soomaaliya u soo dirto ciidan ka qeyb qaata dagaalka ka dhanka ah Alshabaab, islamarkaana gacan ka geysta sugidda amniga deegaannada la xorreeyay.
Arrintan ayaa qeyb ka ah dadaallada labada dal ay hore ugu muujiyeen in ay ka go’an tahay xoojinta amniga gobolka, gaar ahaan difaaca Badweynta Hindiya iyo Badda Cas oo muhiim u ah ganacsiga caalamka.
Ciidanka Masaarida ee imaanaya Soomaaliya ayaa lagu wadaa inay ka mid noqdaan Howlgalka Xasilinta Soomaaliya ee AUSSOM, oo ay ka qeyb yihiin dalal Afrikaan ah. Si kastaba, howlgalka AUSSOM ayaa wajahaya dhaqaale la’aan, maadaama dalalkii deeqda siin jiray ay hoos u dhigeen taageeradooda la xiriirta amniga Soomaaliya.
Hbn Online Tv