Dood kulul oo ku saabsan mustaqbalka caasimadnnimada Garoowe ayaa maanta ka dhacday xarunta Baarlamaanka Puntland, xilli lagu guda jiray Fadhiga 18-aad ee Kalfadhiga 57-aad ee Golaha Wakiillada, kaas oo Ajandihiisu ahaa ka doodista arrimaha caasimadda.
Xildhibaannadu waxay soo jeediyeen hadallo ay siyaabo kala duwan ugu cabbireen hanaanka magaalada looga dhigi karo caasimad buuxisa shuruudaha, iyaga oo xusay in loo baahan yahay in si gaar ah loo eego adeegyada aasaasiga ah ee magaalada.
Waxay ku baaqeen in Garoowe laga saaro ku xirnaanta gobolka Nugaal, si ay u noqoto caasimad loo siman yahay oo leh hannaan u gaar ah, isla markaana awood u leh inay tartan kula gasho Muqdisho haddii loo baahdo.
Sidoo kale, Xildhibaannadu waxay tilmaameen in magaalada ay ka jiraan adeegyo aad u qaali ah, kuwaas oo u baahan dib-u-habeyn iyo qorshe horumarineed si ay u buuxiso shuruudaha caasimad rasmi ah.
Dood dheer kadib, Golaha Wakiillada Puntland ayaa falanqeeyay arrimaha amniga iyo qorshaha horumarinta caasimadda, waxaana ugu dambayn Guddoomiyaha Golaha uu magacaabay guddiga gaarka ah ee talo ka soo jeedin doona qaabka ugu habboon ee loo wajahayo arrimaha caasimadda Puntland.
Hbn Online Tv