Diyaaradaha dagaalka ee Turkiga nooca F-16 oo dhawaan la geeyay Soomaaliya ayaa lagu arkay iyagoo duulimaad hoose ku sameynaya caasimadda Mogadishu, sida ay sheegeen ilo maxalli ah. Duulimaadyadan ayaa imanaya xilli uu sii ballaaranayo iskaashiga militari iyo mid istaraatiiji ah ee u dhexeeya Soomaaliya iyo Turkiga.
Ilo wareedyo ayaa sheegay in saddex diyaaradood oo F-16 ah la keenay Muqdisho bishii hore, halka warar kale ay tilmaamayaan in lix kale oo isla noocaas ah, iyo sidoo kale diyaarado kale oo dagaal, lagu soo dari karo dhawaan. Ilo kale ayaa sheegaya in hawlgal militari oo ballaaran oo ka dhan ah Alshabaab la filayo inuu billowdo kadib dhammaadka bisha Ramadaan, lagana fuliyo gobollada Shabeellaha Dhexe iyo Shabeellaha Hoose, iyadoo Turkigu taageero bixinayo.
Mas’uuliyiin la hadlay warbaahinta ayaa sheegay in diyaaradahaasi ay weli ku hoos jiraan gacanta Turkiga, isla markaana ay ka mid yihiin joogitaanka militari ee ballaaran ee Ankara ku leedahay gobolka. Turkigu tan iyo 2017-kii wuxuu Muqdisho ka howlgeliyaa saldhiggiisa militari ee ugu weyn ee uu ku leeyahay dibadda, wuxuuna sii xoojinayaa xiriirka dhinacyada difaaca, tababarka, iyo kaabeyaasha dhaqaalaha.
Sidoo kale, Turkiga ayaa lagu soo warramayaa inuu ka shaqeynayo dhismaha xarumo dayax-gacmeed iyo tijaabinta gantaallada, isla markaana uu diyaarinayo bilaabista sahminta shidaalka ee Soomaaliya. Ilaa hadda, ma jiro bayaan rasmi ah oo ay soo saareen dowladaha Soomaaliya ama Turkiga oo faahfaahinaya doorka howlgaleed ee diyaaradaha ama isticmaalka suurtagalka ah ee ka dhanka ah Alshabaab.
HBN ONLINE TV