Warar dheeraad ah ayaa kasoo baxaya dagaal xoogan oo duhurnimadii maanta ka dhacay deegaano hoostaga degmooyinka Buula-Burte iyo Halgan ee gobolka Hiiraan oo u dhexeeya ciidmada Dowladda iyo Alshabaab.
Dagaalka maanta dhexmaray ciidamada xoogga dalka iyo kuwa deegaanka oo iskaashanaya iyo kooxda Al-shabaab ayaa la soo sheegay inuu xoogiisa ka dhacay deegaanka Beera yabaal oo hoostaga degmada Buula burte ee gobolka Hiiraan.
Ciidamada iskaashanaya ayaa la sheegay iney si buuxdo ula wareegeen gacan ku heynta deegaanka Beera yabaal iyo deegaanada ku dhadhaw, ka dib dagaal saacado badan qaatay oo halkaas ku dhexmaray labada dhinac.
Saraakiisha Ciidamada Xoogga dalka hoggaaminaya oo warbaahinta dowladda la hadlay ayaa u sheegay inay ku guuleysteen in ay ka kala wareegaan kooxda deegaanada Beero-Yabaal, Bur-Abooto, Eega-Galmay, Jidcillaan iyo Caddow Gurey, sida uu tilmaamay Korneyl Cabdullaahi Cumar oo ah sTaliyaha Qeybta 27-aad ee Ciidanka Xoogga Dalka.
Waxaa uu intaasi ku daray in ay burburiyeen sida uu hadalka u dhigay saldhigyadii Alshabaab ay ku lahaayeen deegaannada lala wareegay iyo inay ka furteen hub iyo saanad ciidan oo nooc walba leh.
“ciidamada ayaa weli sii baacsanaya firxadka Alshabaab maanta lagu jebiyey dagaalka deegaanadaas loogu xoreeyey” ayuu ku yiri Korneyl Cumar.
Sidoo kale, Wasiirka Gaashaandhigga XFS Cabdulkhaadir Maxamed Nuur oo si kooban uga hadlay dagaalkii maanta ka dhacay gobolka Hiiraan ayaa sheegay in jab xoogan la gaarsiiyay sida uu hadalka u dhigay kooxda Al-shabaab.
“Maanta waxaa Jab xoogan Khawaarijta lagu gaarsiiyey Gobolka Hiiraan. Waxaan u mahad celinaayaa Geesiyaasha CXDS iyo dadka reer Hiiraan” ayuu yiri Wasiirka Gaashaandhigga Cabdulqaadir Maxamed Nuur.
Ma jirto ilaa hada war rasmi ah oo xaqiijinaya tirada kooxda Al-shabaab looga dilay dagaalkii ka dhacay inta u dhaxeya Buula burte iyo Halgan ee gobolka Hiiraan, marka laga soo tago guulaha ay dowladda ka sheegtay dagaalka.
HBN ONLINE TV