Madaxweyne Recep Tayyip Erdoğan ayaa sheegay in Turkigu filayo inuu ku dhammeeyo qodista shidaalka badda Soomaaliya muddo u dhaxaysa 6 ilaa 9 bilood, haddii cimiladu saamaxdo howlaha soo saarista shidaalka Soomaaliya. Wuxuu sheegay in howlgalkan uu yahay kii ugu horreeyay ee Turkigu ka sameeyo dibadda, isla markaana uu qayb ka yahay qorshaha tamarta ee Ankara.
Markabka qodista Cagri Bey ayaa bishii Abriil soo gaaray Soomaaliya si uu uga shaqeeyo qodista ceelka Curad-kow oo ku yaalla qiyaastii 370km u jira Muqdisho. Saraakiishu waxay sheegeen in ceelku gaari karo qoto dhan 7,500 mitir, taasoo ka dhigaysa mid ka mid ah howlgallada ugu waaweyn ee shidaal baarista Soomaaliya.
Wasiirka Tamarta Turkiga Alparslan Bayraktar ayaa sheegay in mashruucani uu furayo “waqti cusub” oo ku saabsan sahanka shidaalka iyo gaaska. Ka hor qodista, markabka sahanka Oruc Reis ayaa 234 maalmood xog ka ururiyay 3 goobood oo badda Soomaaliya ah si loo doorto halka ugu habboon ee qodista.
Madaxda Soomaaliya, oo uu ku jiro Madaxweyne Xasan Sheekh Maxamuud, ayaa sheegay in khayraadka dabiiciga ahi yahay hanti qaran oo ay wada leeyihiin shacabka Soomaaliyeed, isla markaana faa’iidadiisa loo qeybin doono si qaran ah. Arrintan ayaa muhiim u ah xilliga Soomaaliya ay wajahayo doodaha ku saabsan maamulka khayraadka iyo dakhliga.
Howlgalkan ayaa sidoo kale ka tarjumaya xiriirka sii xoogeysanaya ee Soomaaliya iyo Turkiga, oo hadda ka gudbay gargaar una gudbay iskaashi dhanka difaaca, amniga badda iyo tamarta. Soomaaliya ayaa rajaynaysa in mashruucani noqdo bilowga warshad shidaal oo rasmi ah kadib sanado badan oo xasillooni darro ah.
HBN ONLINE TV