Iyada oo xaaladda abaaraha ee Soomaaliya ay meel adag gaartay, Qaramada Midoobey ayaa muujisay walaac weyn oo ku saabsan saameynta khatar ee abaaraha, waxayna tilmaantay in malaayiin qof ay wajahayaan gaajo daran, ayna caruur badan la kulmayaan nafaqo-xumo halis ah.
Warbixin cusub oo uu soo saaray xafiiska Qaramada Midoobey ee Soomaaliya ayaa lagu sheegay in ku dhawaad 6.5 milyan oo ruux oo Soomaali ah ay wajahayaan heerar sare oo gaajo ah, halka in ka badan 1.8 milyan oo caruur ah ay la kulmi doonaan nafaqo-xumo daran sanadka 2026.
Warbixinta Qiimeynta Wadajirka ah ee Heerarka Amniga Cuntada (IPC) ayaa muujinaysa in saddex meelood meel dadka dalka ay la kulmi doonaan heerar gaajo oo xun ama ka daran kuwa bishan Maarso, taasoo ka badan 1.7 milyan qof tan iyo Janaayo. Tan waxaa ku jira 2 milyan oo qof oo la kulmaya gaajo daran oo heerka afaraad ah. Abaartu waxay sidoo kale saameyn ba’an ku yeelatay beeraha iyo xoolaha, iyadoo keentay khasaare ballaaran iyo barakac weyn oo dad ah.
George Conway, Isuduwaha Arrimaha Bani’aadantinimada Qaramada Midoobey ee Soomaaliya, ayaa sheegay in degdegga abaarta Soomaaliya ay si xun u sii xumaanayso, iyadoo qiimaha biyaha uu sare u kacay, cunto yari jirto, xoolohu dhimanayaan, iyo lacagaha gargaarka oo aad u yar. Waxa uu intaa ku daray in caawimaad degdeg ah lagama maarmaan u tahay badbaadinta nolosha dadka iyo ka hortagga burburka nolol-maalmeedka, xoolo-dhaqatada iyo beeraleyda.
Hay’adaha Qaramada Midoobay sida FAO, UNICEF, WFP, iyo OCHA ayaa sidoo kale ka digay in xaaladdu ay weli ahaan doonto mid halis ah, inkastoo roobabka Gu’ga ee la filayo bisha Abriil ilaa Juun 2026 ay bixin karaan nafis qaar, wallow meelo qaar haddaba uu ka da’ay.
Dowladda Soomaaliya ayaa tilmaantay in malaayiin dad ah ay wajahayaan gaajo halis ah, qoysas badanna ay horay ugu jireen xaalad degdeg ah, iyo carruur badan oo ku jirta nafaqo-xumo daran.
Abaartan daba dheeraatay ayaa ka dhalatay roob ka hooseeya celceliska xilliga Deyr (Oktoobar ilaa Disembar 2025) iyo jiilal bilo qaatay oo xigay. Goosashada dalagyada galleyda Koonfurta Soomaaliya ayaa 83% ka hooseysa celceliska muddada dheer.
Qaramada Midoobay iyo Dowladda Soomaaliya ayaa sidoo kale digniintooda ku cadeeyey in yaraanta tabarucaadka caalamiga ah ay qasbeyso in hay’adaha gargaarka ay yareeyaan ama joojiyaan barnaamijyo muhiim ah oo badbaado nolosha ah, iyadoo baahiyaha bini’aadantinimo ay weli yihiin kuwo baahsan.
Waxaa sidoo kale la soo sheegay inay jiraan cudurro carruurta ku badan sida shuban-biyoodka, jadeecada, iyo gawracatada, iyada oo adeegyada caafimaadka iyo nafaqada ay xaddidan yihiin.
HBN ONLINE TV