Shirkadda duulimaadyada jaban ee Cumaan, SalamAir, ayaa shaacisay inay bilaabi doonto duulimaad toos ah oo ay ku tagayso Muqdisho laga bilaabo 3-da Sebtembar ee sanadkan 2026, taasoo noqonaysa xiriirkii ugu horreeyay ee duulimaad aan kala joogsi lahayn oo u dhexeeya Cumaan iyo Soomaaliya.
Duulimaadyadan ayaa la qaban doonaa laba jeer toddobaadkii — maalmaha Khamiista iyo Axadda — iyagoo u kala bixi doona Muscat International Airport — kuna degi doona Aden Adde International Airport ee magaalada Muqdisho. Tani waxay siinaysaa rakaabka ka imanaya dalalka Khaliijka fursad ay si fudud oo qiimo jaban ugu gaaraan caasimadda Soomaaliya.
Ku darista Muqdisho waxay ka dhigaysaa Soomaaliya meesha afraad ee Afrika ay ka hawlgasho SalamAir, iyadoo horey uga shaqeysay dalal ay ka mid yihiin Kenya, Egypt, iyo Sudan. Guud ahaan, SalamAir waxay u duushaa in ka badan 40 goobood oo ku kala yaalla Aasiya, Afrika iyo Yurub.
Maamulaha Guud ee shirkadda, Adrian Hamilton-Manns, ayaa sheegay in khadkan cusub uu taageeri doono kobaca dhaqaalaha Soomaaliya isla markaana uu xoojin doono xiriirka ganacsi iyo socdaal ee labada dal.
SalamAir waxay ku biiraysaa shirkado caalami ah oo horey uga howlgalay Soomaaliya, sida Turkish Airlines, Qatar Airways, Ethiopian Airlines, Kenya Airways, Flydubai, Air Arabia, iyo EgyptAir
HBN ONLINE TV