Wasiirka Arrimaha Dibadda Iiraan, Cabbaas Araqchi, ayaa sheegay in Tehran ay ka fakari karto inay lacag ku soo rogto maraakiibta isticmaasha Marin-biyoodka Hormuz, isagoo isbarbar dhigay dalal kale oo lacago ka qaada marin-biyoodkooda istiraatiijiga ah.
Araqchi ayaa sheegay in Masar ay lacag ka qaaddo maraakiibta mara Kanaalka Suweys, halka Turkigu uu canshuuro ka qaado maraakiibta isticmaasha Marin-biyoodka Bosphorus, waxa uu sidoo kale xusay in Panama ay lacag ka qaaddo maraakiibta mara Kanaalka Panama, isla markaana Kanada ay lacago ka qaaddo maraakiibta isticmaasha marin-biyoodka St. Lawrence.
Wasiirka ayaa sheegay in Iiraan aysan muddo tobannaan sano ah wax lacag ah ka qaadin maraakiibta ganacsiga ee mara Marin-biyoodka Hormuz, inkastoo ay wajahday cunaqabateyn dhaqaale iyo cadaadis siyaasadeed oo uga yimid dalalka reer Galbeedka.
Araqchi ayaa ku dooday in siyaasaddaas ay muujinayso sida Tehran ay uga go’an tahay ilaalinta isu socodka ganacsiga iyo tamarta caalamka, isagoo su’aal geliyay dhaleeceynta ay reer Galbeedku u jeediyaan Iiraan.
Hadalladan ayaa imanaya xilli xiisadaha gobolka ay sare u kaceen, iyadoo Marin-biyoodka Hormuz uu yahay marin ay maraan ku dhowaad shan meelood meel saliidda dunida laga isticmaalo. Iiraan ayaa qorshahan ku doonaysa inay xoojiso dooddeeda ah inay door ka qaadato xasilloonida isu socodka maraakiibta caalamiga ah, isla markaana ay ka hortagto waxa ay ku tilmaantay dhaleeceyn iyo cunaqabateyn aan caddaalad ahayn.
Iiraan oo qorshaynaysa inay lacag waddo-maris ah ku soo rogto maraakiibta ka gudbaysa Marinka Hormuz
