Manchester United ayaa lagu soo waramayaa inay diyaar u tahay inay Manchester City kula dagaalanto saxiixa ciyaaryahanka khadka dhexe ee Newcastle United Bruno Guimaraes inta lagu guda jiro suuqa kala iibsiga xagaagan.
Mustaqbalka 26-sano jirkaan ayaa haatan ah mid si weyn loo hadal hayo, iyadoo qaar badan oo ka mid ah kooxaha hormuudka ka ah kubadda cagta adduunka la rumeysan yahay inay jecel yihiin xiddiga heerka caalami ee dalka Brazil.
Guimaraes ayaa St James’ Park ka yimid Lyon bishii Janaayo 2022, waxaana uu matalay Magpies 97 jeer, isagoo dhaliyay 13 gool isagoo diiwaan geliyay 13 caawin.
Xiddiga khadka dhexe ayaa mar kale qaab ciyaareed fiican ku jira xilli ciyaareedkan isaga oo dhaliyay 3 gool waxana uu diiwaan gashaday 7 caawin 40 kulan oo uu saftay tartamada oo dhan.
Newcastle ayaa hoos ugu dhacday kaalinta 10-aad ee kala sarreynta horyaalka Premier League, halka Sabtidii ay ka reebtay FA Cup-ka Man City.
HBN SPORTS DESK